lipu pi ante toki

Sakkasutta

lipu pi kulupu Saka (Shaka)

tan lipu pi toki nanpa Ankutalanikaja (Anguttaranikaya)

 

tenpo la jan sewi awen lon poka pi ma Kapilapatu (Kapilavatthu) lon ma kasi Panjan (Banyan). tenpo suno pi moku lili la jan Saka (Shaka) mute li tawa jan sewi. ona mute li kama li kama anpa tawa ona la ona mute li anpa e monsi ona mute lon poka. ona mute li awen anpa la jan sewi li toki e ni tawa ona : “jan Saka mute o, sina pali ala pali e tenpo suno pi moku lili kepeken kon luka tu wan?”

“jan sewi o, tenpo la mi mute li pali; tenpo la mi mute li pali ala.”

“jan Saka o, ni li ike tawa sina. ale li jo e pilin ike e moli la ni li ike tawa sina: tenpo la sina pali e tenpo suno pi moku lili kepeken kon luka tu wan; tenpo la sina pali ala.

“jan Saka o, sina pilin e seme? o toki insa e ni: tenpo suno ale la mije li pali li kama jo e mani lili. jan o pana ala pana e nimi pi mije wawa tawa ona?”

“jan sewi o, pana.”

“toki insa e ni: mije li pali li kama jo e mani wan… e mani tu… e mani tu wan… e mani luka… e mani luka luka… e mani ale… e mani luka luka ale ale. jan o pana ala pana e nimi pi mije wawa tawa ona?”

“jan sewi o, pana.”

“toki insa e ni: mije li kama jo e mani luka luka ale li awen e mani ona li lon tenpo sike suno ale la, ona li kama ala kama jo e mani mute?”

“jan sewi o, kama.”

“sina pilin e seme: tenpo suno anu tenpo pimeja anu tenpo lili la mije ni li pilin ala pilin e kon pona tan mani ni?”

“jan sewi o, ala. tan seme? tan ni: kon la pilin pona sijelo li awen ala li weka lon insa ona li lon ala.”

“jan Saka o, ni li lon: jan pi nasin mi li pali kepeken nasin mi lon tenpo sike suno luka luka. ona li pilin e kon pona lon tenpo sike suno mute anu tenpo sike suno ale anu tenpo sike suno luka luka ale anu anu tenpo sike suno luka luka ale ale. ona li kama sin lon tenpo wan. anu la ona li kama sin ala. anu la ona li tawa insa nasin.

tenpo sike suno luka luka ala. ni li lon: jan pi nasin mi li pali kepeken nasin mi lon tenpo sike suno luka tu tu… lon tenpo sike suno luka… lon tenpo sike suno tu tu… lon tenpo sike suno tu wan… lon tenpo sike suno tu… lon tenpo sike suno wan. ona li pilin e kon pona lon tenpo sike suno mute anu tenpo sike suno ale anu tenpo sike suno ale ale. ona li kama sin lon tenpo wan. anu la ona li kama sin ala. anu la ona li tawa insa nasin.

tenpo sike suno wan ala. ni li lon: jan pi nasin mi li pali kepeken nasin mi lon tenpo sike mun luka luka… lon tenpo sike mun luka… lon tenpo sike mun tu tu… lon tenpo sike mun tu wan… lon tenpo sike mun tu… lon tenpo sike mun wan… lon tenpo sike mun lili. ona li pilin e kon pona lon tenpo sike suno mute anu tenpo sike suno ale anu tenpo sike suno ale ale. ona li kama sin lon tenpo wan. anu la ona li kama sin ala. anu la ona li tawa insa nasin.

tenpo sike mun lili ala. ni li lon: jan pi nasin mi li pali kepeken nasin mi lon tenpo suno luka luka en tenpo pimeja luka luka… lon tenpo suno luka en tenpo pimeja luka… lon tenpo suno tu tu en tenpo pimeja tu tu… lon tenpo suno tu wan en tenpo pimeja tu wan… lon tenpo suno tu en tenpo pimeja tu… lon tenpo suno wan en tenpo pimeja wan. ona li pilin e kon pona lon tenpo sike suno mute anu tenpo sike suno ale anu tenpo sike suno ale ale. ona li kama sin lon tenpo wan. anu la ona li kama sin ala. anu la ona li tawa insa nasin.

“ni li ike tawa sina. ale li jo e pilin ike e moli la ni li ike tawa sina: tenpo la sina pali e tenpo suno pi moku lili kepeken kon luka tu wan; tenpo la sina pali ala.”

“jan sewi o, tan ni la tenpo kama la mi pali e tenpo suno pi moku lili kepeken kon luka tu wan.”