pona tawa pona sona sewi a!
tenpo la mi kute e ni. jan sewi en kulupu jan pi nasin sewi en kulupu pi jan Posisata (Bodhisattva) mute li lon ma Lasakija (Rajagrha) lon kiwen Kitakuta (Grddhakuta). ona li pini pana e sona pi nasin suno la jan sewi li kama lukin lawa. tenpo ni la jan sewi Posisata Awalokitesala (Avalokiteshvara) suli li pali e pona sona la ona kin li lukin anpa tan sewi li lukin e kulupu pi ijo luka li kama sona e ni: ona mute li weka lon insa.
kepeken wawa pi jan Puta (Buddha) la jan sewi Saliputa (Shariputra) li toki e ni tawa jan sewi Posisata Awalokitesala suli: “jan lili pi kulupu mama pona li wile pali e pona sona la ona o pali e seme?“
jan sewi Posisata Awalokitesala suli li toki e ni tawa jan sewi Saliputa: “jan lili pi kulupu mama pona li wile pali e pona sona la ona o toki insa e ni:
“kulupu pi ijo luka li lon. ona mute li weka lon insa. jan Saliputa o, sijelo li weka lon insa. weka lon insa li sijelo. weka lon insa en sijelo li ante ala. sama li lon tawa pilin en lukin en wile en lawa. jan Saliputa o, ijo ale li weka lon insa li jo ala e kon. jan li pali ala e ona mute li pini ala e ona mute li jaki ala e ona mute li weka ala e jaki tan ona mute. ona mute li kama lili ala li kama suli ala. jan Saliputa o, tan ni la weka lon insa li lon la sijelo en pilin en lukin en wile en lawa li lon ala; lukin en kute en nena en linja uta en sijelo en lawa li lon ala; sijelo en kalama en pilin nena en pilin uta en pilin luka en ijo wile lawa li lon ala; ilo insa lukin… en ilo insa lawa li lon ala; sona ala en pini pi sona ala… en sin ala en pini pi sin ala en moli en pini moli li lon ala. pilin ike en tan en pini en nasin li lon ala; toki lawa en kama jo en kama jo ala li lon ala.
“jan Saliputa o, tan ni la jan Posisata li wile ala e kama jo la ona li wile e pona sona taso. toki insa ni li awen ala la ala li kama monsuta e ona. ona li anpa e pilin ike la ona li awen lon kon sewi Niwana (Nirvana). jan Puta ale li wile e pona sona la ona mute pi tenpo tu wan li pini e sona ala li kama sona e sona pona lon.
tan ni la jan o sona e ni: lon la sona Pasapalamita (Prajñāpāramitā) li wawa sewi li wawa sewi pi sona suli li wawa sewi nanpa wan li wawa sewi lon poka pi sama ala li pini pi pilin ike. seme li kama pakala? sona Pasapalamita li toki e wawa sewi ni. ona li toki e ni: Kate Kate Palakate Palasankate Posi Sowa! jan Saliputa o, jan o pali e ni lon pona sona.
jan sewi li pini lukin lawa li toki pona tawa jan sewi Posisata Awalokitesala suli: “toki pona a! toki pona a! jan lili pi kulupu mama pona o! jan lili pi kulupu mama pona o, nasin ni la jan o pali e pona sona. sina pana e sona ni. jan Tatakata (Tathagata) ale li pilin sama.”
nasin ni la jan sewi li toki. pilin pona mute la jan sewi Saliputa en jan sewi Posisata Awalokitesala suli en jan mute ni pi nasin sewi en jan Posisata suli mute ni en jan sewi ale en jan ale en jan sewi ike ale en jan waso sewi ale en jan sewi pona lili li pilin pona tan pana sona pi jan sewi.